Regionhistorie for Hardanger kjem ut i tre band på Fagbokforlaget hausten 2013. Med dette når Hardanger Historielag målet som har stått øvst på arbeidsplanen i mange år. Vi ser verkeleg fram til den storhendinga i laget si historie.

Hardanger treng eit bokverk som omfattar heile regionen og set historia inn i nye perspektiv. Verket skal retta seg mot hardingar og lesarar i vår tid. Målet er at verket vert så viktig og flott at alle må ha det i bokhylla.

Forfattarane er for lengst i gang med å skriva og dei møtest jamleg på huset til Fagbokforlaget i Bergen for å drøfta og samordna manuskripta. Dei røynde historikarane professor emeritus Edgar Hovland og professor Ståle Dyrvik føl godt opp som fagkonsulentar på vegne av Fagbokforlaget og historielaget og kjem med merknader og gode innspel. Leiar i Hardanger Historielag Marit Bleie Mannsåker møter og på forfattarsamlingane og føl elles opp søknads- og finansieringssida i lag med forretningsførar Øystein Pugerud.

Forfattarane er Svein Ivar Angell, Bård Gram Økland, John Ragnar Myking, Herdis Kolle, Jo Rune Ugulen, Martin Byrkjeland og Knut Grove. Forlagsredaktør er Dag Grønnestad, og Harald Hognerud er engasjert som fotograf.

Trebindsverket omfattar spennet frå dei eldste tider til vår eiga tid. Dette krev eit omfattande arbeid  og er eit stort økonomisk løft. Budsjettet er på 6.5 mill. Laget har sjølv gått inn med 1,15 mill.

Historia peikar heile tida framover.

Skaparkraft, frå fjord og fjell, i foss og bølgje.

Næring, samfunn og kultur.

Alt blir grundig omtalt i dette historieverket som vil

setja sitt preg på kjensla av å høyra Hardanger til.